La batalha de Cuito Cuanavale se debanèt entre setembre de 1987 e març de 1988 dins lo corrent de la Guèrra Civila d'Angòla (1975-2002). Foguèt la consequéncia d'una tiera d'afrontaments entraïnats per la temptativa dei Fòrças Armadas de Liberacion d'Angòla (FAPLA) de destrurre una importanta guerilha de l'Union Nacionala per l'Independéncia Totala d'Angòla (UNITA). Lei dos camps foguèron respectivament ajudats per lei fòrças armadas de Cuba, qu'aviá mandat expedicionari en Angòla per i ajudar militarament lo regime comunista, e de Sud-Africa, que sosteniá lei movements anticomunistas de la region dins l'encastre de la Guèrra d'Independéncia de Namibia (1966-1988).
Fòrça saunosa, la batalha s'acabèt a tèrme cort per una revirada relativa de totei lei camps engatjats. Lei doas faccions angolesas subiguèron de pèrdas duras. Lei Sud-Africans foguèron pas capables de rompre lei posicions defensivas deis unitats cubanas mai lei fòrças de Cuba poguèron pas organizar un assaut generalizat de son adversari en causa de l'importància de la poissança de fuòc sud-africana. Deguèron donc laissar l'armada sud-africana se retirar lentament vèrs lo sud. A tèrme lòng, l'eissida de la batalha foguèt una desfacha per lei movements anticomunistas e per lo regime d'apartheid. D'efèct, l'UNITA foguèt obligada de negociar un alta-au-fuòc ambé lo govèrn comunista que marquèt la fin dau premier periòde de la Guèrra Civila d'Angòla e Sud-Africa perdiguèt sa supremàcia militara regionala, çò que permetèt d'accelerar la fin de l'apartheid.